Castru de Cuaña

Cuaña ye un asentamientu (sieglu IV a.C.) asitiáu na marxe izquierda de la ría de Navia, sobre una llomba, arrodiáu de muralles y con accesu dende'l sur. La principal estructura defensiva asítiase precisamente nel sur y consiste nun potente fosu escaváu nel sustratu pizarrosu y rematáu por una muralla. Internamente, el pobláu organízase en dellos sectores.

Tien planta romboidal, na que s'estremen de forma nidia los siguientes espacios:

• L'acrópolis. Recintu de planta triangular arrodiáu por una muralla. La so función principal nun yera habitacional. L'accesu taba protexíu por un torrexón de planta cuadrada.
• El barriu norte. Baxo la muralla norte de l'acrópolis distribúise'l sector habitáu, formáu por cabaña de planta circular na so mayoría. Dalguna d'elles presenta'l so accesu al traviés d'un antepar o corredor. Los murios son de pizarra y les esquines arrondaes.
• El recintu sacru. Dientro del recintu habitáu, cerca de la puerta de l'acrópolis, hai dos grupos de construcciones acomuñaes a canalizaciones y a una piscina, recipiente de granitu denomináu ''bañera'', lo que fai pensar que se tratara d'unes termes o saunes rústiques.